الصراحة كنت متردد اكتب الموضوع لحالة التبلد والكسل المسيطرة عليا لفترة طويلة .. وقررت اكتبه كنوع من التأرييخ لا اكثر ويمكن حد يستفيد منه
اللي كمان مكنش مشجعني ان 2014 كانت سنة غزيرة انتاجياً وفيها العديد من الالبومات الجيدة او الجيدة جداً لكن للاسف مكنش في علامات او اساطير ويمكن تفسيري للموضوع نابع عن اقتناع ان الفرق بتلعب اللعبة بامان بدون مخاطرات او تجريب حاجة جديدة ، فتلاقي اما لو فريق عريق بيحاول يرجع للجذور او بيحاول يحافظ علي التيمة الناجحة ليه الا فيما ندر
اخيراً الالبومات مش مرتبة من الاقل للافضل الا في اخر 4 البومات واللي هما البومات العام بالنسبة لي
=============================
Vader
Tibi et Igni
اباء بولندا بيرجعونا لسنة 1998 او ما شبه .. ورجعوا اللوجو القديم وكل ما هو جميل علشان يخرجوا التحفة دي، للاسف دائما بحس انهم مش واخدين حقهم اللازم والكريدت اللي يستاهلوه
كالعادة حسبكم مع تحفة فنية من الالبوم الرائع ده
============================
Opeth
Pale Communion
طبعا الكل عارف اني فان بوي كبير لاويث … الانتقال من بروج ديث باند ل بروج روك كان متوقع لاسباب كتير كلنا عارفانها لكن الالبوم اللي شهد التغيير ده
Heritage
كان في غاية السوء الا عن بعض اللمحات .. السنة دي اوبث قدموا البوم بروج روك جميل ومن احلي البومات السنة لكن طبعا لا دول اوبث ولا دي لمستهم الخارقة ولا دول الناس اللي كانوا بينزلوا علامات موسيقية مش البومات
واحد من افضل تراكات العام
==========================
Epica
The Quantum Enigma
بعد البوم شهد تغيير للاسوء ومحاولة تسويق الفريق خارج اوساط مجتمع الميتال وانتقادات كتير .. يرجع الفريق لرشده وللخلطة السحرية والبوم جيد جداً ولكن يظل اقل من مجمل اعماله بخطوات قليلة
انا عموما محب كبير لابيكا ونفسي يكملوا في طريقهم بعيد عن المقارانات مع الجوث ميتال الهولندي اللي بيروح بشكل او باخر لسكة البوب روك
===============================
Meadows End
The Sufferwell
ايه اللي ممكن اقوله … اكتشاف العام بدون منازع بدون رغي كتير من احلي البومات العام بخلاف انه عوضني شخصياً عن اختفاء اقرانهم
Zonaria
لانهم قريبين منهم قوي
متحمس جداً جداً للفريق ده واتمني يكون ليه شأن كبير في مقبل الالبومات
========================
Savage Messiah
The Fateful Dark
اخيرا عود احمد لفريقي المفضل خلال السنين الاخيرة في نوع الـ
Thrash metal
اخر اعمال الفريق مكنش علي قد المستوي .. الموضوع كان اشبه بالانحدار لان اول البوم للفريق
Insurrection Rising
كان من احلي الالبومات اللي سمعتها في حياتي كلها
عموما الالبوم ده يعتبر في المرتبة التانية مباشرة بعده تحفتهم السابق ذكرها
============================
Arch Enemy
War Eternal
في يوم غريب .. صحينا كلنا الصبح لنجد ان انجيلا ايكونة الفريق والفوكال قد قررت مغادرة مكانها لصالح الشابة اليافعة اليسا وايت جلوز مغنية فريق
the agonist
وقررت انجيلا انها تكمل مع الفريق في منصب المدير الاداري وانا كنت متوقع كده لان كنت قريت كتير ان انجيلا مبقتش تقدر تكمل الحفلات للاخر وانها عندها مشاكل في صوتها بعامل السن بخلاف ان البوم الفريق الاخير مكنش علي قد المستوي
وتقريبا ده كان قرار صائب جدا لان في نفس يوم اعلان الخبر الهائل ده، الفريق نزل كليب من الالبوم الجديد وكانت اغنية
War eternal
وكان النتيجة مبشرة للغاية وتحس ان الفريق اتضخله دم جديد وحماس اكتر وشوفنا كلنا ترجمة ده في الالبوم الاخير واللي يعتبر من احلي البومات الميلوديك ديث ميتال السنة دي
حالياً انا مستني اكتر من الفريق خصوصا بعد انضمام جيف لوميز للفريق واللي ميعرفوش هو جيتاريست فريق نيفرمور وكان مرشح في فترة طويلة للانضمام لميجاديث
===================================
Souldrainer
Architect
يا الهي … بعد شوية ديموهات روعة والبوم خارق للعادة في 2007 … للاسف تعرض المشروع الجميل ده للعديد من الضربات برحيل العديد من اعضاء الفريق وخصوصا رحيل الفوكال جوهان كوليتكو
وللاسف شوفنا نتيجة الضربات دي في البوم مخيب للامال سنة 2011 مش فاكر منه اي شيئ
لكن الفريق وبعد ما غير شوية من استايله وراح في سكة الميلوديك ديث بتاعت العظماء
Hypocrisy
شوفنا البوم رهيب … ومن اروع ما يكون
عود احمد .. ومع واحدة من اجمل اغاني الالبوم
====================================
At The Gates
At War With Reality
خبر عودة الفريق للحياة من جديد اصاب العديد من محبيه بالقلق … انت بتتكلم عن فريق بشكل كبير ساهم في تأسيس نوع فرعي كبير في الميتال وهو الميلوديك ديث ميتال يعني حاجة اسطورية
وقريت اراء كتير ان دول راجعين علشان الفلوس ودول حيبوظوا تاريخم وكلام تنظيري حمضان
وينزل الالبوم .. وينزل كف علي قفا كل مدعي من المنظرين وينزل واحد من اجمل البومات العام
اجمل رسالة لكل اصحاب مقولة الفرق العظيمة اللي انفصلت لا يفضل عودتها
من احلي تراكات الالبوم
==================================
Mors Principium Est
Dawn Of The 5th Era
فريقي المفضل في نوع الميلوديك ديث ميتال … للاسف مشكلتهم الكبيرة دائما انهم قليلوا الانتاج بنتكلم عن فريق في 15 سنة نزل 5 البومات ومنهم فترات كان في شك في انفصالهم لشح الاخبار عنهم، لكن الاخبار دي زالت بنزول البوم
…and Death Said Live
في 2012
واللي مكنش علي اد التوقعات … لكن الفريق رجع لمعدنه الاصلي وقام باصدار افضل البوم ميلوديك ديث ميتال لعام 2014 من وجهة نظري
مع جوهرة من جواهر الالبوم المتعددة
=================================
Dark Fortress
Venereal Dawn
الفريق فعلاً غريب … دايما كنت بقول عليهم المجددين في البلاك ميتال، فريق بيحاول في كل البوم يقدم افكار وسكك جديدة في نوع التجديد فيه من المحرمات
المشكل الاكبر ان الالبوم ده مقدرش اقول عليه انه البوم بلاك ميتال بسبب الحجم المهول في التغيير .. البوم بلاك ميتال في حاجات هادية وواحدة بتغني عربي وميلوهات ياما
!!!!!!!!!!!!
لكن طبعا الالبوم خارق للعادة لمحبي الموسيقي ومش عبدة الـ
Genres
واحد من احلي تراكات العام للفريق العبقري ده
=================================
Empyrium
The Turn Of The Tides
من العته وضرب من الجنون اني اقول يعني ايه عودة ايمبريوم تاني … ومن السذاجة اني اشرح ليه الالبوم ده من احلي البومات السنة
واحدة من احلي الاغاني اللي سمعتها بشكل عام
====================================
وهنا نيجي بقي لاحسن اربع البومات للعام 2014 واللي كانت المصادفة ان يبقي كلهم تحت نوع
Progressive Metal
بس قبل ما ادخل عليه عايز بس اقول كام حاجة كـ
honorable mention
عودة بينك فلويد في 2014 باخر البوم ليهم هو حدث تاريخي بكل ما تحمله الكلمة من معني .. وشخص مثلي اقل اني اقيم الالبوم او احطه في اي خانة ما
———
لينكن بارك رجعوا للميتال بس فقدوا اللمسة بتاعتهم
———
هاكن نزلوا 3 اغاني يبدوا من خلالهم اننا حنكون مع البوم قوي في 2015
———
واخيرا سافاتاج رجعوا للحياة ولو عايز تعرف واقع الخبر عليا شوفي اسمي واسم المدونة
يلا بينا
=================================
المركز الرابع
Threshold
For The Journey
للاسف للاسف للاسف انا متضايق جداً ان حاطط الالبوم ده تحت كلمة المركز الرابع … لان دي اول تجربة البوم كامل للفريق ده معايا وهي تجربة عظيمة للغاية
معرفش اصلا ليه كنت مقتصر في سماعي للفريق علي تراكات هنا او هناك وكانت بتعجبني جداً بس هو كسل بعيد عنكم
جنة البروج ميتال كاملة حتلاقيها في الفريق ده سواء انتاج عالي او تنوع او فوكال مميز او اعضاء محترفين في الفريق
ياريت اللي حيسمع الالبوم يبص علي تراك
The box
لانه من احلي تراكات العام لكنه للاسف ملقتوش
===============================
المركز الثالث
Vanden Plas
Chronicles of the Immortals – Netherworld (Path 1)
امسح التراب وفتح عينك عن فريق عظيم هربت منه كتير لكن بمجرد اني سمعت البوم كامل ليه .. دخل عالطول في لسته احلي البومات السنة
كونسبت رهيب وتنوع كبير بين اغاني الالبوم ومنتظر بشدة
Path 2
مع واحدة من اجمل اغاني الالبوم
=========================
المركز الثاني
Evergrey
هل تعلم ايها القارئ العزيز اني من اكبر كارهي الفريق ده … اعماله العظيمة بالنسبالي عادية .. اخر البومات ليهم من اسوء ما سمعت في الميتال بشكل عام
والكوميديا تبلغ ذروتها اني نزلت الالبوم ده بالغلط وكنت حمسحه من غير ما اسمعه لما عرفت الغلطة لكن قلت اديله فرصة سماع لمرة واحدة بس وبعد كده امسحه
يعني كنت مقرر اني حمسحه سلفاً وعارف انه مش حيعجبني
وادي السبب المباشر لاني ممسحتش الالبوم انه تاني افضل البوم سمعته في 2014 علي الاطلاق
ودي لمحة من الالبوم
=============================
المركز الاول والبوم العام
Anubis Gate
الالبوم ده نزل في شهر ابريل .. يعني السنة كان فاضل فيها 8 شهور كاملة .. ومن اول مرة سمعت الالبوم ده كنت عارف ان احسن البوم في السنة كلها وعارف ان مفيش البوم حيعجبني اكتر منه
يمكن ده الالبوم الوحيد اللي ممكن اقول ياخد لقب البوم علامة حنفتكرها كتير بخلاف كل ما سبق
بخلاف ان الالبوم متنوع وكله اغانيه تقريبا في غاية الروعة الا انه كمان يحمل في طياته افضل تراك عجبني في سنة 2014 بدون منازع
اسيبكم مع تراكي المفضل ونتلقي ان شاء الله العام القادم